Lucas小旅行：倫敦金絲雀碼頭（Canary Wharf)

Lucas舊年年尾黎英國客串第四台嘅內閣辦公室（The Cobra)，

但點知香港突然之間封關，搞到我一直返唔到香港， 

錯過左拍好多節目同廣告嘅機會 >< 

英國又咁岩lockdown，冇得出街，長期住酒店唔係咁理想，

咁我不如租一個大小小嘅地方寫下post同好好休息下！

咁我果時就揀咗一個性價比幾高又安全嘅地方：金絲雀碼頭⛵️（Canary Wharf)

呢度類似香港嘅金鐘，所以好多投資銀行嘅總部都係呢度，

Lucas都有唔少同學仔由香港分部轉黎呢邊返工，

由於係國際金融機構嘅關係，英國稅後嘅人工同香港都係差唔多，

所以對生活品質唔會有太大影響，不過聽聞工時都係一樣好長，

我都係半夜先搵到佢地食飯啦...

除咗搵工之外，講下呢一區嘅衣食住行，一落街就有商場，

我淨係帶咗好小衫黎英國，我著開嘅英倫風、法國風同北歐風係呢度都好易搵到，

好似有低價位Zara 、COS! 運動品牌有我好鍾意嘅lululemon ，或者去JD Sports一次搵到晒Nike/ Adidas/ Fila/ Champion! 

家品有北歐風嘅Flying Tiger，英倫風嘅John Lewis! 

至於超市呢有皇室御用超市等玫瑰（Waitrose）入面有海鮮賣嫁！

如果想買中日韓食材可以去天天超市，呢度嘅食材調味好齊，譚仔都煮到！

行到攰仲可以飲番杯珍珠奶茶，有兩間台灣過江龍，

我鍾意萬波嘅珍珠奶茶，一方水果茶係用新鮮水果整，我都好鍾意❤️

中餐有皇朝酒家，香港都有分店嫁，品質有一定嘅保證！

呢邊仲有好多好食嘅野，大家留意我IG/ FACEBOOK會慢慢介紹！

呢度嘅交通算好好，佢雖然坐落Zone 2，

由於係金融區嘅關係，有好多車會停呢度，

所以可以話係四通八達！

咁到底金絲雀碼頭好唔好住呢？

Lucas住屋有幾個條件呢度都唔難搵到，

第一：勁近地鐵站，英國冬天真係好難頂，

而且倫敦塞車問題好嚴重，住得近地鐵真係好重要！

第二：要近商場，因為我唔鍾意開車，

冬天要出街買野又係好痛苦，依家樓下有商場有茶飲幾唔錯！

第三：要有會所設施！依家我落樓下就有水游有gym做，

如果冬天要去大老遠做，我會冇動力去，變肥仔><

第四：治安好！我係英國都試過比人搶野，住好小小嘅區當買保險啦！

第五：有河景，我係香港都望到維港景，咁要係倫敦都要搵到差唔多嘅！

所以我住咗係度一段時間都覺得唔錯，下次再帶大家睇吓其他地方啦！